Во време кога Македонија кубури со пожарникари, возачот на владиниот ген сек, барал мито за да вработи граѓанин во скопската протипожарна бригада. За услугата да изврши влиајние кај градските власти побарал мито од 1500 евра. Се започнало кога човекот кој сакал да се вработи како пожарникар, на 24 јули пријавил дека вработен во Службата за општи и заеднички работи сака да го искористи влијанието кое го има, а за возврат да добие пари. Осомничениот возач пак го уверувал дека познава вработени во Град Скопје кои ќе можат да помогнат тој да биде избран по распишување на огласот за прием на пожарникари.
- „Според пријавата, Д.Ц. побарал парична награда во вкупен износ од 1.500 евра, од кои 500 евра како прва рата. Притоа, тој посочил дека познава лица кои можат да влијаат врз постапката за вработување“ стои во кривичната пријава од МВР.
Осомничениот оди во притвор 30 дена. Обвинителот ценел дека тој може да влијае во истрагата и на сведоци или да го повтори истото дело. Судија од кривичен го прифатил предлогот.
Од Владата велат дека осомничениот како возач во Генералниот секретарјат се вработил по примерот на сите други. Ја поздравуваат брзата реакција на истражните опргани и нагласуваат дека ова е потврда на заложбите за бескомпромисна борба против корупцијата.
- „Со овој случај се покажува дека законите важат за сите, се докажува волјата и целта на Владата да се бори против корупцијата. Со ова се подвлекува јасна граница помеѓу оние кои сакаат злоупотреби и сите други кои се борат против нив. Ова е уште еден пример како преку заедничка соработка на органите и институциите може да се спроведе правда“ соопштија од Владата.
Обвинителите ги повикуваат граѓаните да се охрабрат и да пријавуваат ваквите случаи и да соработувааат со надлежните институции.
- „Навременото пријавување на корупцијата и подготвеноста на граѓаните да соработуваат со надлежните институции е исклучително важно. Пријавувањето на барање или понуда за поткуп и противзаконито влијание овозможува навремена реакција, обезбедување докази и ефикасно постапување на надлежните органи“ велат од ОЈО за ГОКК.
Обвинителството за организиран криминал порачува дека надлежните инситуции остануваат посветени за одлучно постапување по сите сознанија за корупција.
