Барал 100 евра за да избрише судска казна од 200 евра, вработен во Основниот суд во Гостивар е уапсен поради сомнеж за примање поткуп. МВР соопшти дека вчера вечерта полициски службеници од Полициското одделение Ростуше го уапсиле 40-годишниот вработен, жител на селото Присојница, Општина Маврово и Ростуше.
Тој бил приведен по пријава на жител од селото Калиште, Општина Врапчиште, кој навел дека осомничениот, како вработен во Основниот суд во Гостивар, преку заеднички пријател му понудил за паричен надомест од 100 евра да избрише судска казна од 200 евра и изречена забрана за управување со моторно возило во траење од шест месеци.
Приведениот тврдел дека предметната документација пристигнала кај него на извршување и дека може да „заврши работа“. Осомничениот е задржан во полициска станица, а против него ќе биде поднесена соодветна кривична пријава до надлежното обвинителство.
