Авион на релација Приштина–Истанбул вчера излета од пистата по слетувањето на аеродромот „Сабиха Гокчен“ во Истанбул, но за среќа нема повредени патници. Инцидентот се случил во момент кога леталото, по приземјувањето, наместо да продолжи по патеката, се излизгало на мека земјена површина и авионот застанал на крајот од пистата. Од Амбасадата на Косово во Турција соопштија дека сите патници во авионот се безбедни. „Патниците се евакуирани без никаков ризик, преку надворешни скали, без потреба од користење на итните лизгалки. Нема пријавено повредени и сите го продолжија патувањето кон своите дестинации“, наведуваат од амбасадата. Станува збор за авион на компанијата Еџет. Инцидентот се случил во услови на силни врнежи, поради што, како што објаснува авиокомпанијата, дошло до излетување при маневрирањето.
