За само осумнаесет месеци двојно е зголемен бројот на корисниците на е-услугите во земјава, и сега тој изнесува 240.000 граѓани, а отворени се и вкупно 13 центри ширум државата. Во моментов, интересот е најголем за студентските ваучери за електронски уреди, но граѓаните по електронски пат вадат и разни дозволи, уверенија, па сè до лични документи. Довербата во овие системи постојано се зголемува и кај повозрасните граѓани, најмногу поради брзината со која се доаѓа до потребните документи, уверува ресорниот министер Стефан Андоновски.
„Мислам дека граѓаните го препознаваат порталот, дека на едно место можат брзо, без да бараат некому да му платат мито, без да чекаат во редови, без да ‘бркаат’ врски, да си ја завршат брзо работата, и 120.000 наши сограѓани во една година го забележаа и препознаа тоа. Во секој случај, се согласувам дека треба да работиме уште повеќе на доедукација и промоција на нашите сограѓани кои можеби не користат дигитални алатки. Затоа тука се Центрите за услуги – имавме пет, отворивме уште вкупно осум и сега имаме 13 во целата држава, кои служат како мост помеѓу Порталот и граѓаните кои можеби не користат електронски услуги“, вели Стефан Андоновски, министер за дигитална трансформација.
Општина Битола е една од општините што се најактивни во оваа сфера. Речиси сите општински услуги битолчани можат да ги добијат по електронски пат и за многу пократко време отколку во досегашната „хартиена“ верзија.
„Дел од активностите што ги имаме се во ГИС-системот, информатички систем кој ги дава услугите во градежништвото, урбанистички планови итн., и ДМС-системот кој го воведовме и сè уште го храниме со информации. Фактички, сето она што влегува како барање од граѓаните мора да помине низ тој систем – било да е меѓусебна комуникација помеѓу вработените, помеѓу секторите во општината – и буквално нема зафрлен предмет и го нема она од што најмногу се плашат граѓаните: предмет во фиока“, потенцираше Тони Коњановски, градоначалник на Битола.
Овие современи услуги од Националниот портал uslugi.gov.mk денеска беа промовирани во Битола, во присуство на министерот Андоновски, кој за скоро време најави воведување на вакви услуги и од Фондот за здравство, како и од Министерството за земјоделство, за кои, тој е уверен дека ќе бидат новиот е-хит.
