Американските преговарачи денеска ќе патуваат за Исламабад, но Иран тврди дека негови функционери нема да се сретнат директно со американската делегација за разговори за крај на војната. Белата куќа соопшти дека Стив Виткоф и Џаред Кушнер ќе разговараат со иранскиот министер за надворешни работи, Абас Арагчи, кој веќе се наоѓа во Пакистан.
Сепак, портпаролот на иранското Министерство за надворешни работи изјави дека не е планирана директна средба со САД, туку иранските предлози ќе бидат пренесени преку пакистанската страна.
Арагчи синоќа се сретна со пакистанскиот министер за надворешни работи и најави дека во наредните денови ќе ги посети и Оман и Русија.
Портпаролката на Белата куќа, Керолајн Ливит, вчера изјави дека САД забележале позитивни сигнали од Иран и се надеваат дека тие ќе се засилат во текот на викендот, особено поради тоа што и потпретседателот Џеј-Ди Венс е подготвен да отпатува во Пакистан.
