Амбасадорот на Франција Кристоф Ле Риголер попладнево беше во работна посета на Неготино. Задоволство од средбата, изрази новата градоначалничка на оваа општина, Марија Нацева, на Фејсбук.
– За амбасадорот „Неготино е главен град“, алудирајќи на фактот што токму во нашиот град е отворена првата билингвална паралелка на француски јазик и нашиот град има посебно место и посебни врски во делот на соработката со Амбасадата на Франција. Како градоначалнчка на општина Неготино дадов ветување дека заедно со одговорните во СОУ „Свети Кирил и Методиј“ правиме и ќе продолжиме со поддршката за учениците кои имаат афинитети за изучување на францускиот јазик и негово подигнување на уште повисоко ниво, сподели таа.
Притоа го информирала амбасадорот за приоритетите во нејзиниот мандат, меѓу кои се изградба на патна и комунална инфраструктура, реконструкција на градскиот плоштад, реконструкција на УЗ 8.1, нова противпожарна станица, реконструкција на старата социјална зграда и нејзина пренамена, како и модернизација на општина Неготино.
– Во делот на развојот на индустриските зони и можноста за инвестирање, амбасадорот Ле Риголер најави потенцијален интерес за инвестирање во нашата општина од инвеститори од Република Франција, напиша Нацева.
