Делегација од Општина Македонска Каменица, предводена од градоначалничката Соња Стаменкова, престојуваше во студиска посета на Велење, каде одблиску се запозна со процесите на праведна транзиција и економска трансформација на региони поврзани со рударската индустрија.
Во состав на делегацијата беа и советничките во Советот на Општина Македонска Каменица, Адријана Пауновска Спасевска и Валерија Стојановска, кои присуствуваа на презентација организирана во општината Велење и оствариле средба со тимот задолжен за развојните политики и прогресивните процеси во градот.
-Посебен впечаток од посетата ни оставо начинот на кој Велење се подготвува за постепена трансформација на економијата, додека рудникот за лигнит сѐ уште функционира. Паралелно со рударството, во градот активно се развиваат мали и средни претпријатија, како и езерски и бањски туризам, со цел зачувување на постојните и отворање нови работни места, информира Стаменкова.
Во рамки на посетата, делегацијата го посетила и рударскиот музеј, изграден во еден од поранешните подземни копови, каде се спуштиле на околу 160 метри длабочина.
– Тоа беше силно и автентично искуство кое најдобро ја доловува тежината на рударската работа, но и значењето на транзицијата што треба да обезбеди сигурна иднина за луѓето и заедниците кои со децении живееле од оваа индустрија, посочуваат учесниците во посетата.
Студиската посета била реализирана со поддршка на Friedrich Ebert Stiftung, на што делегацијата изрази благодарност.
