Неопходна е поопсежна анализа на законите поради несовпаѓањето на висината на казните со тежината на последиците во случаите со смртен исход, истакна денеска јавната обвинителка Адела Бојчевиќ, по изрекувањето на првата неправосилна пресуда за Стојанче Јовановски во траење од 12 години затвор за три кривични дела поврзани со континуирано семејно насилство кое резултираше со трагична смрт на неговата сопруга и нивната малолетна ќерка.
Основниот кривичен суд – Скопје го осуди Јовановски за три кривични дела, односно пет години затвор за телесна повреда при вршење семејно насилство, три години за загрозување на сигурноста и пет години затвор за наведување на самоубиство и помагање во самоубиство. Сите три дела се споени во вкупна затворска казна од 12 години.
Бојчевиќ истакна дека за кривичните дела е изречена максималната предвидена казна, потенцирајќи ја неопходноста од построга казнена политика бидејќи иста затворска казна до пет години е предвидена и за телесна повреда при вршење на семејно насилство и за наведување на самоубиство и помагање во самоубиство.
– Се работи за неправосилна пресуда која очекуваме одбраната да ја обжали, со оглед на фактот дека судот му изрече на обвинетиот максимални казни за трите кривични дела. Од друга страна, имаме пресуда и казна за наведување на самоубиство. Ја имаме најтешката последица, а тоа е губење на човечки живот. Ќе искоментирам дека казнената политика можеби не е во корелација и не соодветствува на најтешката последица што ја имаме во вакви случаи. Особено што првпат имаме случај на проширено самоубиство, а не само самоубиство. Сметам дека тоа би требало да биде предмет на една поопсежна анализа од страна на правните експерти и изготвувачите на законите, во насока на построга и подобрена казнена политика. Бидејќи не може да предвидуваме казна затвор до пет години каде што има телесна повреда, а истата казна затвор до пет години да ја предвидуваме и каде што имаме смртна последица – истакна Бојчевиќ.
Адвокатката Неда Чаловска, бранителка на оштетената Љубица Стојановска, мајка на сега починатата Ивана Јовановска, ја нагласи историската важност на пресудата како патоказ за понатамошното постапување на државните институции.
– Она што е многу значајно е што за првпат имаме пресуда за наведување на самоубиство поради семејно насилство и сметам дека тоа е голем чекор кој во иднина треба да се следи. Заради тоа што, во случаите на самоубиство, понатаму државните институции треба да истражуваат дали тоа било поради претходно семејно насилство, како што беше во овој случај. Исто така, сакам да истакнам дека целата постапка беше ефикасна и навистина Јавното обвинителство реагираше брзо. Освен што покажа ефикасност во овој случај, покажа и сензибилитет, што не е секогаш пример во сите случаи на семејно насилство, така што се надевам дека и во иднина ќе се следи оваа пракса – рече Чаловска.
