Лишени биле од слобода двајца кавадарчани, едниот возел без возачка дозвола, другиот со 1,52 промили алкохол во крвта, информираа денеска од Секторот за внатрешни работи – Велес.
– Синоќа во 23:50 часот на улицата „Мито Хаџи Василев Јасмин“ во Кавадарци, полициски службеници од ОВР – Кавадарци го лишија од слобода Н.М., на возраст од 38 години од овој град. При сообраќајна контрола, тие сопреле товарно возило „мазда“ со кавадаречки регистарски ознаки, што тој го управувал и по преземени мерки и извршени проверки, било констатирано дека возилото го управувал пред да се стекне со право на управување – појаснија од СВР – Велес.
Претходно, во 19:15 часот на улицата „Западен булевар“ во Кавадарци, полициски службеници од ОВР – Кавадарци го лишиле од слобода С.С., на 67-годишна возраст од овој град.
– При сообраќајна контрола, полициски службеници сопреле патничко возило „форд“ со кавадаречки регистарски ознаки, управувано од С.С. и по преземени мерки и извршени проверки било констатирано дека возилото го управувал под дејство на алкохол, односно измерени му биле 1,52 промили алкохол во крвта – соопштија од СВР – Велес.
Оттаму информираа дека по насоки од јавен обвинител, двајцата биле приведени во полициска станица, возилата биле привремено одземени и по документирање на настаните, против нив ќе биле поднесени соодветни пријави.
