По информации и дојава од американското ФБИ, македонската полиција спроведе акција за апсење на двајца онлајн измамници во тетовска Мала Речица.
Станува збор за разбивање на дел од нелегален онлајн пазар вреден најмалку половина милион долари, при што биле злоупотребувани и лични податоци. Во координираната акција со ФБИ приведени се двајца 20 и 23-годишни млади лица, за кои постојат основани сомненија дека биле администратори на онлајн пазарот. Тие биле затекнати на лице место при вршење кривично дело, за време на претресот.
При тоа се одземени десктоп компјутери, лаптоп компјутери и телефони, кои ќе бидат предмет на понатамошна форензичка анализа и ќе послужат како доказ во кривичната постапка. Според обезбедените сознанија, онлајн пазарот бил активен од јули 2023 година и функционирал преку повеќе интернет-домени, содржејќи детална база на компромитирани лични податоци за регистрација на сметки на клиенти и продавачи. Евидентирани биле над 2.600 кориснички сметки и повеќе од 1.500 сметки на продавачи, а вкупната продажна вредност на артиклите надминува 500.000 американски долари.
