Шпанскиот премиер Педро Санчез, кој собра околу 20 светски лидери од левицата во Барселона, изјави дека е потребно да се реформираат Обединетите нации.
Владите на Шпанија, Бразил и Мексико повикаа на помош за Куба.
– Веруваме во меѓународен поредок заснован на правила, но мултилатералниот систем има потреба од обнова. Обединетите нации ќе можат да преживеат само ако ја претставуваат реалноста, изјави Педро Санчез на самитот „Во одбрана на демократијата“.
Опкружен од државници од земји како Бразил, Мексико и Јужна Африка, чие економско и политичко влијание порасна во последните децении, шпанскиот социјалист изјави дека се потребни подемократски и порепрезентативни ОН.
– Дојде време ОН да бидат обновени и, зошто да не, да бидат предводени од жена, рече Санчез.
Учесниците на самитот предупредија дека е потребно повторно да се воспостават правилата за да не можат некои земји произволно да ги напаѓаат другите, кршејќи го меѓународното право.
– Гледаме напади врз мултилатералниот систем и опасна нормализација на употребата на сила, предупреди Санчез, осврнувајќи се на Израел, САД и Русија.
