САД и Иран не успеаја да постигнат договор за завршување на конфликтот и за отворените прашања меѓу двете земји. Американскиот потпретседател Џеј-Ди Венс денеска го напушти Пакистан и рече дека од преговорите со иранските претставници во Исламабад носи добра и лоша вест.
„Имавме серија суштински разговори со Иранците, тоа е добрата вест. Лошата вест е дека не постигнавме договор. Мислам дека тоа е лоша вест за Иран, а не за САД. Многу јасно им ставивме до знаење на Иранците кои се нашите црвени линии“, изјави американскиот потпретседател пред да замине од Исламабад.
Венс рече и дека САД ја дале својата конечна и најдобра понуда, а Иранците одбиле да ги прифатат американските услови за договор, за кои рече дека биле доста флексибилни. Тој додаде дека, по повеќечасовни преговори, Иран не се откажал од својата нуклеарна програма, што беше едно од клучните прашања во разговорите.
Во врска со преговорите во Исламабад се огласи и портпаролот на иранското Министерство за надворешни работи, кој рече дека несогласувањето околу две или три клучни прашања спречило договор со САД. Тој посочи дека двете страни постигнале договор за некои прашања, но дека имаат разлики во ставовите за други.
Ниту Вашингтон, ниту Техеран не соопштија што ќе се случи по двонеделниот прекин на огнот.
