Американските астронаути Вилијам Мекартур, Виктор Гловер и Кристина Кох, заедно со канадскиот астронаут Џереми Хансен, безбедно се вратија на Земјата по успешно завршената историска тест-мисија околу Месечината во рамки на програмата „Артемис“.
Капсулата „Орион“ од мисијата „Артемис 2“ по речиси десет дена поминати во вселената влезе во Земјината атмосфера и безбедно се спушти во Тихиот Океан, во близина на брегот на Калифорнија. По контролираното слетување во водата, спасувачките тимови на американската морнарица брзо пристигнаа до капсулата, по што астронаутите беа извлечени и префрлени на безбеден брод, а потоа и на копно, каде им беше извршен првичен медицински преглед.
Во текот на мисијата, екипажот изведе повеќе сложени орбитални маневри, ја обиколи Земјата, а потоа се упати кон Месечината, изведувајќи прелет во нејзина близина. Тие поминаа низ најоддалечената точка од Земјата што некогаш ја достигнал човечки екипаж, со што мисијата претставува значаен чекор во подготовките за идно слетување на Месечината.
Во текот на патувањето, астронаутите спроведоа бројни научни и технолошки тестирања, вклучувајќи проверка на системите за животна поддршка, комуникација и заштита од зрачење, кои ќе бидат клучни за идните долготрајни мисии во длабоката вселена.
Мисијата беше лансирана на 1 април од вселенскиот центар „Кенеди“ во Флорида, што претставува прв човечки лет кон Месечината по повеќе од половина век, од ерата на програмата „Аполо“. Првиот ден по лансирањето астронаутите поминаа во орбита околу Земјата, а потоа започнаа патување кон Месечината, каде изведоа прелет и се вратија назад кон планетата.
„Артемис 2“ претставува прва тест-мисија со екипаж во новата американска програма за истражување на Месечината, чија крајна цел е воспоставување долгорочно човечко присуство на лунарната површина, како и подготовка за идни мисии кон Марс. Со овој лет, НАСА направи важен чекор кон враќањето на човекот подлабоко во вселената и отворање на нова ера на истражување.
