Иран се закани со уште поуништувачка одмазда ако САД ги нападнат неговите електрани и мостови

Иран предупреди дека ќе изврши уште поуништувачка одмазда доколку Доналд Трамп ги оствари своите закани и ги нападне иранските електрани и мостови. Трамп прецизираше дека крајниот рок за отворање на Ормускиот теснец истекува во среда, во два часот по средноевропско време. „Доколку нападите врз цивилни цели се повторат, следните фази од нашите офанзивни и одмазднички операции ќе бидат многу поразорни и пошироко распространети“, соопшти Главниот штаб на иранската војска. Трамп му се закани на Иран со пекол ако не прифати договор и не го отвори Ормускиот теснец, клучна траса за извоз на нафта и гас од Блискиот Исток, која е затворена за најголемиот број бродови од почетокот на американско-израелските напади. И покрај заканите, Трамп вели дека САД и Иран преговараат и дека договор е можен. Сајтот „Аксиос“ објави дека американски, ирански и регионални преговарачи разговараат за условите за можен 45-дневен прекин на огнот, што би довел до траен крај на војната. Техеран бара целосен крај на непријателствата, а претседателот на иранскиот парламент ги осуди заканите на Трамп, велејќи дека е заведен од израелскиот премиер Бенјамин Нетанјаху.