Четиринаесетте дебарски пожарникари во првите три месеци годинава имале двојно повеќе работа споредено со истиот период минатата година, евидентирајќи 114 интервенција, што е за 61 интервенција повеќе.
-Од вкупниот број 67 се интервенции на отворен простор, 24 на објекти, две на сообраќајни средства, додека останатите 21 се технички интервенции. Нашата статистика потврдува дека во последните години има зголемен број интервенции. Така, во истиот период минатата година имавме 53, во 2024 година 11 интервенции, што беше најмала бројка во седумдецениската статистика на нашата единица. Година пред тоа за три месеци имавме 37 интервенции, изјави Џетан Мифтароски, командир на единицата.
Имајќи предвид дека сè уште се наоѓаме во период на грејна сезона, Мифтароски апелира до граѓаните редовно да ги чистат оџаците, бидејќи години на ред тие се главната причина за пожари на објекти.
Исто така апелира да не се пали вегетација и да се внимава при движење на отворен простор да не се фрлаат догорчиња од цигари или палат огнови.
Дебарските пожарникари, освен во општина Дебар, интервенираат и во општините Центар Жупа и Маврово и Ростуше, односно подрачјето на Река, но по потреба, од хуман аспект, интервенираат и во пограничниот појас на албанска страна, што е во рамки на воспоставената соработка меѓу општините, Дебар и Пешкопеја.
