Медицинскиот третман често ја става во втор план емоционално-психолошката состојба на пациентите со карцином. Но, токму ваквата поддршка е еден од клучните фактори што им помага полесно да се соочат со болеста, објаснува психотерапевтот Анета Кирова. Таа е дел од проектот „Бесплатна психолошка поддршка“ на Здружението „Лирас“, кој преку групни разговори им овозможува на заболените од карцином да споделат искуства и полесно да се справат со предизвиците.
„Истражувањата покажуваат дека лицата кои се вклучени во групна работа, на коишто им е понудена психолошка поддршка, имаат можност полесно да се справат со третманот, да имат поквалитетен живот, се намалува анксиозноста и социјалната изолација“ – изјави психотерапевтот Анета Кирова.
Групите ќе ги водат стручни лица во атмосфера каде пациентите слободно ќе зборуваат за стравовите и стресот, а истовремено ќе бидат поттикнати храбро да се борат со болеста. Средбите ќе им овозможат размена на искуства, што дополнително ќе ја олесни психолошката состојба на пациентите.
„На сите корисници им се нуди можност да се соочат со дијагнозата на начин што обезбедува нормализирање на нивните чувства, чувство на припадност и разбирање, стручна помош за справување со стресот, но и можност да добијат помош и да ги прифатат сопствените телесни и животни промени“ – изјави психотерапевтот Весна Трајковска.
Проектот е поддржан од Општина Штип и ќе трае шест месеци. Средбите ќе се одржуваат еднаш неделно, а покрај пациентите, поддршка ќе можат да добијат и нивните најблиски членови од семејството.
