„Сејф Сити“ спасува животи. Паметните камери кои од јануари годинава ги регистрираат неправилностите на македонските патишта ги даваат посакуваните резултати – помалку сообраќајни незгоди, помалку загинати и помалку повредени. Во првите осум месеци од 2026 година бројот на загинати во сообраќајки е намален за 35 отсто во споредба со истиот период лани. Од МВР посочуваат дека безбедноста во сообраќајот се повеќе се мери преку трагедиите кои биле спречени.
„Во периодот јануари–август 2025 година во сообраќајни незгоди животот го загубиле 96 лица, додека во истиот период од 2026 година загинале 62 лица. Тоа се 34 помалку загинати лица. Истовремено, вкупниот број настрадани лица е намален од 4.731 на 3.868. Станува збор за 863 помалку загинати и повредени лица, односно намалување од 18,24%.“- велат од МВР.
Податоците покажуваат дека возачите се повнимателни и почесто ги почитуваат сообраќајните правила, со што е намален и бројот на најтешките сообраќајни незгоди. Бројот на сообраќајки со смртни последици е намален за 34%, додека бројот на незгоди со тешки телесни повреди е намален за 11 отсто.
„Бројот на сообраќајни незгоди со телесни повреди е намален од 2.291 на 1.896 или за 17,24%, а бројот на сообраќајни незгоди со материјална штета од 2.518 на 2.362, односно за 6,20%. Бројот на лица со телесни повреди е намален од 3.949 на 3.116, односно за 21,09% или 833 лица.“- велат од МВР.
Статистиките од изминатите години исто така ја потврдуваат ефикасноста на „Безбеден град“. Во периодот од 2010 до 2025 година, годишно загинувале меѓу 116 и 198 лица. Во 2019 и 2025 година биле регистрирани по 132 жртви.
Системот започна автоматски да регистрира прекршоци на први февруари оваа година. Возачите кои не ги почитуваат правилата добиваат казна преку СМС порака или е-маил. Од МВР потенцираат дека ќе продолжат со унапредување на системот за уште помалку сообраќајни незгоди и загубени животи.
