Универзитетот „Гоце Делчев“ (УГД)-Штип денеска со низа на дебати и презентации пред студентите, средношколците и граѓаните ја одбележува „Европската ноќ на истражувачи“. Проректорот на УГД-Штип, Дарко Лазаров на денешната прес-конференција рече дека „Европската ноќ на истражувачи“ е европска научна манифестација, во која што се вклучени повеќе од 50 универзитети ширум Европа.
-За таа цел широко ги отвараме вратата, односно вратите на нашиот универзитет за студентите, за младите средношколци, меѓутоа и за љубопитните граѓани. Преку серија на активности, интерактивни работилници, научни експерименти, меѓутоа и преку културни, односно уметнички манифестации ќе се обидеме да го промовираме универзитетот, меѓутоа и неговата научно-истражувачка димензија односно улога во општеството – вели Лазаров.
Тој посочи дека на тој начин покажуваат оти УГД-Штип е еден европски модерен универзитет, кој што широко ги отвора вратите и е транспарентен кон јавноста. Цел на Универзитетот „Гоце Делчев“-Штип не е само да создаваат и да креираат наука, туку многу повеќе – таа да ја пренесуваме кон младите и исто така да ја применуваат во решавање на различни предизвици, со кои секојдневно се соочува нашето општество.
Александра Милева дека на Факултетот за информатика при УГД-Штип вели дека денеска се слави науката, бидејќи таа е двигател на нашето општество – денес и во минатото.
-Ги отворивме вратите на лабораториите, ќе има, младите ќе можат да се запознаат со нашите лаборатории, ќе има изведување на експерименти, ќе има научнопопуларни предавања, ќе има панел-дискусија за храната каде што ќе научат дека храната може да им биде пријател или непријател на нивното здравје. Главниот настан се случува вечерва, каде што ќе имаме богата уметничко-културна програма, но исто така ќе имаме и изложување на претставување на сите факултети и лаборатории и дел од средните училишта од Штип и Источна Македонија – изјави Милева.
Настанот ќе се одржи вечерва во 18 часот, во спортската сала „Јордан Мијалков“ во Штип.
