На третиот ден од војната, европските лидери почнаа да се делат про и контра американско-израелските чекори. Германија нема да учествува во нападите врз Иран, изјави министерот за одбрана Јохан Вадепул, додека Франција кажа дека е подготвена да придонесе за одбраната на заливските земји.
За разлика од Велика Британија, Германија нема воени бази во регионот, но единици на германската војска се стационирани во Јордан и Ирак. „Германските војници ќе се бранат ако бидат нападнати, но нема да има мерки надвор од тоа“, рече Вадепул, оценувајќи го Иран како закана не само за Израел и регионот, туку и за Европа и Германија.
Изразувајќи солидарност со Саудиска Арабија, Обединетите Арапски Емирати, Катар, Бахреин и другите заливски земји, францускиот министер за надворешни работи Жан-Ноел Баро кажа дека тие се вовлечени во војна што не ја избрале. Иако смета дека американско-израелската воена акција нема прецизна цел, Баро изјави дека Франција е спремна да учествува во одбраната на земјите од Персискиот Залив, кои се најдоа на удар на ирански одмазднички напади.
Емануел Макрон вчера изјави дека Франција го зголемува своето воено присуство на Блискиот Исток по американските и израелските напади врз Иран.
