Израелската војска соопшти дека Хезболах е целосно одговорен за ескалацијата, откако меѓу двете страни владееше примирје од 2024-та година. Либанското Министерство за здравство информираше дека во израелските напади загинале 31 лице.
Изутринава се огласија сирени за тревога и во Тел Авив и Ерусалим, најавувајќи нови ирански воздушни напади. Светските новински агенции известија за нови експлозии и во Доха, Бахреин, Дубаи и Кувајт, каде што има американски воени бази, а чад се издига од областа каде што се наоѓа американската амбасада во Кувајт.
Британското Министерство за одбрана потврди дека британска воена база на Кипар била нападната со дрон, при што била предизвикана минимална штета и немало загинати. Истрагата е во тек за да се утврди од каде бил лансиран дронот.
„Нашите вооружени сили околу полноќ реагираа на напад со беспилотно летало врз базата на Кралските воздухопловни сили Акротири на Кипар“, соопшти Британското Министерство за одбрана.
Нападот врз оваа база се случи неколку часа откако Велика Британија им дозволи на САД да ги користи британските воени бази за напади врз Иран. Британија досега не беше директно вклучена во американско-израелските напади, но премиерот Кир Стармер синоќа изјави дека пристапот на Иран ги ставил во опасност животите на Британците, што довело до одлуката да им се дозволи на САД да користат две британски воени бази.
