Американскиот државен секретар Марко Рубио ја продолжува својата турнеја низ Европа со посета на две земји управувани од блиски сојузници на американскиот претседател Доналд Трамп.
Рубио пристигна во Словачка утрово и подоцна во текот на денот ќе биде во Унгарија во дводневна посета.
Во говорот на Минхенската безбедносна конференција вчера, државниот секретар ги повика Европејците да ги поддржат ставовите на американскиот претседател за светскиот поредок, а воедно најави и оживување на врските со „силна“ Европа.
Рубио е во Братислава само неколку часа, но во тој период ќе се сретне со премиерот Роберт Фицо.
Според „Политико“, кој се повикува на анонимни европски дипломати, за време на неговата неодамнешна посета на Флорида, Фицо изразил загриженост за менталната состојба на американскиот претседател – тврдење што Вашингтон и Братислава енергично го негираа. По средбата во Флорида, словачкиот лидер рече дека имал „исклучително важни“ разговори со Трамп за нуклеарната енергија.
По Словачка, Рубио ќе отпатува во Будимпешта на средби в понеделник со претставници на унгарските власти, вклучувајќи го и премиерот Виктор Орбан.
Доналд Трамп не ја криеше својата поддршка за Орбан на парламентарните избори во Унгарија, закажани за 12 април, кого го опишува како „силна и влијателна личност“.
Унгарскиот премиер ја објави својата намера да отпатува во Вашингтон следната недела за да присуствува на првиот состанок на Советот за мир на американскиот претседател.
