Градоначалникот на општина Илинден Александар Георгиевски и компанијата „Панекс експо“ ДООЕЛ и годинава потпишаа меморандум за соработка, со кој официјално се потврдува организацијата на „Експо Илинден 2026“.
Како што се наведува во соопштението од Општина Илинден, со овој меморандум се продолжува успешната соработка меѓу Општината и Панекс експо, со што втора година по ред ќе се одржи овој регионален економски саем чија цел е понатамошно зајакнување на локалниот економски развој преку поврзување на бизнис заедницата, претприемачите, инвеститорите и другите релевантни чинители. „Експо Илинден 2026“ повторно ќе биде платформа за промоција на домашните компании, размена на идеи, воспоставување нови партнерства и отворање можности за раст и инвестиции.
Градоначалникот на општина Илинден Георгиевски истакна дека континуитетот на ваквите настани е од исклучително значење за локалната економија и дека Општина Илинден и понатаму ќе биде активен партнер во иницијативи кои придонесуваат за одржлив развој и поквалитетен живот за граѓаните.
– Организацијата на саемот по вторпат е показател за позитивните резултати од првото издание, како и за континуираниот економски напредок на општина Илинден. Општината, како покровител на настанот, уште еднаш ја потврдува својата заложба за поддршка и унапредување на економскиот и бизнис сектор, посочуваат од Општина Илинден.
