Откако во 2025 година Гевгелија ја понесе титулата Град на културата, Општина Гевгелија годинава предвидува зголемени средства за поддршка и развој на културните активности.
Според Годишната програма за финансирање програми и проекти од областа на културата, за културни манифестации и творештво ќе бидат издвоени околу 9,6 милиони денари.
Најмногу средства, односно 2.150.000 денари, се наменети за фестивалот „Вкуси го југот“, кој веќе три години по ред се одржува како културно-забавна манифестација со подготовка на традиционални гевгелиски специјалитети и настапи на македонски изведувачи.
По нив следи ЈОУ Пионерски дом „Јосип Броз Тито“ со 1. 500.000 денари, интернационалниот детски музички фестивал „Калинка“ за кој се одобрени 800.000 денари и ЈОУ Дом на култура „Македонија“ со 400.000 денари.
Промоторите на македонскиот фолклор, ансамблот за традиционална музика и игри „Бојмија“ ќе добијат 210.000 денари, а КУД Танец – Миравци и КУД Негорци од Негорци по 150.000 денари.
Во програмата се финансирани и активностите на градската библиотека „Гоце Делчев”, градскиот мешан хор „Гортинија”, „Бош фестивал” и други културни манифестации и настани.
