Во руски напад со беспилотно летало врз патнички воз во североисточна Украина загинале пет лица, пишува „Гардијан“, повикувајќи се на информации од обвинителите. Нападот украинскиот претседател Володимир Зеленски го осуди како тероризам.
Според обвинителите, на местото на нападот врз возот, кој се случил во близина на село во украинскиот Харковски регион, се пронајдени пет тела. Возот сообраќал од Чоп, во близина на западните граници на Украина со Унгарија и Словачка, до градот Барвинкове. Од фотографиите објавени на социјалните мрежи може да се видат најмалку два вагона во пламен.
„Во која било земја, напад со беспилотно летало врз цивилен воз би се сметал исто како тероризам. Нема и не може да има воено оправдување за убивање цивили во вагон на воз“, напиша Зеленски во објава на социјалните мрежи.
