Трагедија во Грција. Во експлозија и пожар во фабрика за бисквити во централна Грција загинаа најмалку четворица работници, а едно лице е исчезнато, соопштија властите. Седуммина други, вклучувајќи и еден пожарникар, се хоспитализирани по експлозијата во фабриката „Виоланта“ во близина на градот Трикала.
Експлозијата се случила за време на ноќната смена, а пожарот што уследил ја уништил фабриката. Противпожарните екипи со часови се бореле со огнената стихија пред да извлечат четири женски тела од уништената зграда. Истражителите се сомневаат дека експлозијата настанала во близина на печките, кои работат 24 часа на ден.
Шестмина работници и еден пожарникар се лекуваат во болницата во Трикала и ниту еден не е во сериозна состојба.
