Обвинетиот Кадир Кара го призна убиството на турскиот државјанин Енес Оздемир во кафуле во центарот на Штип. На судското рочиште денеска пред судот изјави дека не го планирал убиството, туку дека отишол на средба со жртвата за да разговара.
Како што вели обвинетиот, откако видел дека таму присутни биле седуммина блиски на убиениот, самиот проценил дека му подготвуваат заседа и убиството го сторил во знак на самоодбрана. Неговиот адвокат Османов вели дека се работи за убиство на миг, а не за убиство со умисла.
Престојот на обвинетиот Кадир Кара во земјава не бил пријавен уредно, а за оружјето со кое е извршено убиството немал дозвола. Тој не им бил непознат ниту на турските власти. Претходно во повеќе наврати бил осудуван во Турција за разни кривични дела.
Вооедно и останатите двајца – исто така обвинети за помагање, биле осудувани во својот роден крај, а во Македонија се претставувале со лажен идентитет.
