Денес, на Клиниката за трауматологија, ортопедија, анестезија, реанимација и интензивно лекување (ТОАРИЛУЦ) во Скопје, за прв пат во Македонија беше изведена операција со навигациски систем за вградување тотална протеза на колк.
Интервенцијата ја изведоа д-р Макридис Константос од Грција, д-р Игор Мерџаноски, директор на ТОАРИЛУЦ, д-р Дурим Асани, раководител на Ортопедија, заедно со стручниот тим на клиниката. За време на операцијата беше применета компјутерска навигација, која овозможува исклучително прецизно поставување на протезата со 3D визуелизација на колкот во реално време.
Покрај хирурзите, во процесот на едукација за користење на навигацискиот систем се вклучени и лекари и помошен медицински персонал, што овозможува поширока примена на оваа современа технологија во иднина.
Во текот на денот се предвидени и три операции со навигациски систем за вградување протези на колена, при што во еден од случаите ќе бидат заменети двете колена истовремено – ретка и комплексна интервенција кај пациенти со билатерална артроза (гонартроза) на колената.
Придобивки за пациентите од навигациската хирургија:
- Подобра функционалност на зглобовите
- Поголема стабилност и подолг животен век на протезите
- Намален ризик од компликации
- Побрзо закрепнување и побрзо враќање на секојдневните активности
Со оваа интервенција, Клиниката за ТОАРИЛУЦ дополнително се позиционира како водечки центар во Македонија, кој ги применува најсовремените светски стандарди во хирургијата на колк и колено.
Објавата може да ја погледнете на следниот линк:
