Бугарските политички турбуленции нема да влијаат во изградбата на железничкиот тунел што ќе ги поврзе Македонија и Бугарија – дециден е вицепремиерот и министер за транспорт Александар Николоски. Тој вели дека ова лето багерите ќе бидат поставени на терен, а во моментов се работи на документацијата за подготовка, изградба и оперативност на меѓуграничниот железнички тунел.
Истовремено надлежните заедно со Агенцијата за просторно планирање работат на нов просторен план,кој според Николоски е од стратешко значење за идниот развој на државата. Тој потенцираше дека Македонија, како природна крстосница меѓу Југоисточна и Централна Европа, мора јасно да ја искористи својата геостратешка позиција.
“Гледаме во овие глобални предизвици колку е важно Македонија енергетски да се поврзува и во таа насока изградбата на интерконекторот кој не поврзува со Грција како и планираниот интерконектор со Србија, ќе значи дека Македонија ќе стане и енергетска раскрсница. А во меѓувреме интензивно се работи и на далноводно поврзување и со Албанија преку далноводот Охрид-Елбасан. Тука се автопатите, железничките поврзувања, логистичките центри, мултимодуларните јазли особено јазолот со вкрстувањето на коридор 10 со коридор 8, подобрување на меѓуграничната поврзанот и др, истакна Николоски.
“Во моментов, Агенцијата ги има предадено Нацрт-просторниот план. Се очекува планскиот период да биде до 2040 година. Во наредната година планираме да биде донесен Предлог-планот. Тој треба да помине во собраниска процедура и да се донесе. Просторен план се носи неколку години” вели Гелески.
Од Владата очекуваат новиот план за просторно планирање да биде донесен низ транспарентен процес и со него да се решат бројни дилеми и да се постави патот за развој на државата до 2040 година.
