Обезбедување здрава и чиста животна среднина, преку континуирано системско, но и институциално и лично делување, е еден од првите реализирани проекти на новата прилепска локална власт. Ветеното е исполнето. На иницијатива на градоначалникот Дејан Проданоски, под мотото „Еко-мисија, твој потпис за природата“, денеска во градот под Марковите Кули, беа собрани илјадници тони смет на над 20 градски и приградски локации. На некои од тие сегашни диви депонии, за скоро време треба да никнат и големи рекреативи паркови.
„Еден од најголемите паркови, на 30 илјади метри квадратни, би се најдувал во близина на селото Волково, околу Вештачката акумулација која што се наоѓа таму. Токму таа беше симболиката прво да исчистиме, па да направиме катче за рекреација, а со тоа да дадеме и пример дека овие простори околу градов, излетнички места, места за пешачење, за движење, за рекреација, треба да бидат чисти и да бидат пријатни кога се движиме низ нив, а паралелно со тоа е и она за подигање на еко-свеста“, – изјави Дејан Проданоски, градоначалник на Прилеп.
Освен се’ уште ниската еколошка свест кај некои граѓани, во Прилеп проблем е и недостигит на кадар кој би ги „ловел“, а следествено на тоа, и соодветно би ги санкционирал загадувачите. Ова, уште повеќе, и зашто ако граѓаните не се фатат на лице место, таквото дело потоа тешко се докажува, велат од Секторот за животна средина. Од овие причини, од ЛС најавуваат поставување и на камери на јавни пртостори кои ќе бидат таргетиретирани како потенцијални диви депонии.
„Еден инспектор е за животна средина. Јас имам редовни надзори, вонредни надзори и инцидентни надзори. Одлагањето на отпадот вообичаено се врши во полладневните часови кога јас не сум на работа, а по Законот за јавна чистота може да постапува и Полицијата. Како единка, јас не би можела сама да направам многу. А секако дека треба да се изрекуваат казни“, – рече Цветанка Николоска, Сектор за животна средина при ЛС Прилеп.
Казните за несовесните граѓани се движат од 500 до 1.000 евра, а додека за правните, тие се движат од 9.000 до 15.000 евра. Во денешната градска генералка беа вклучени преку илјада граѓани од јавните претпријатија, компаниите,училиштата, невладиниот сектор, како и од администрацијата.
