Десет пациенти завршиле под нож и преживеале тешка операција на срце без да има потреба за тоа. Ова го открила интерната комисија на Министерството за здравство која изминативе месеци имаше задача да провери дали поради профит, пациенти беспотребно се упатувале на интервенции во приватните клиники.
Од 25 пристигнати пријави за сомнителни кардиохируршки интервенции, комисијата анализирала 19. Од нив, во 10 случаи е утврдено дека операциите биле непотребни, или дека пациентите биле упатени без доволна медицинска оправданост.
Министерот за здравство Азир Алиу вели дека следува влегување во сите клиники ширум земјва, државни и приватни, за да се направи дополнителна анализа.
Засега комисијата не открива во кои клиники се правени непотребните операции и колкава е штетата на државниот буџет за овие интервенции. Претседавачот на комисијата Жарко Христовски вели дека не е етички коректно ниту правно издржано во оваа фаза да се открие во кои болници се извршени операциите.
Комисијата ќе ги провери сите клиники и досиејата на пациентите на кои им биле извршени тешки операции на срце. Ќе работи со меѓународна експертска комисија, со цел да се направат конкретни препораки за подобрување на третманот на пациенти со срцеви болести.
Откако ќе завршат проверките, ќе се знае дали за овој скандал работа ќе има и Јавното обвинителство односно дали ќе има и кривична одговорност.
Алармот за ова прашање го вклучи кардиологот Сашко Кедев со неговата изјава дека во приватни болници во земјава се вршат хируршки интервенции без вистинска потреба, поради профит.
