По осум години власт на СДСМ, на овие Локални избори „падна“ и Крушево. Новиот градоначалник на општината е Нико Чонески од редовите на ВМРО-ДПМНЕ. Чонески, својот противкандидат Томе Христоски, кој се бореше за трет мандат и кој во првиот круг беше во водство, вчера го победи во тесна и неизвесна битка со вкупно освоени 2.643 гласа. „Вечерашната победа не е моја, таа е на сите нас. Сите заедно победивме со желбата Крушево да биде поубаво и попросперитетно место за живеење, но и попривлечно за посетување“, – напиша синоќа на социјалните мрежи победникот Чонески, истовремено уверувајќи ги своите сограѓани дека веќе од денеска ќе пристапи кон реализацијата на сите ветени проекти.
„Крушево, кое што за жал, колку што е прекрасно, толку има и проблеми. Проблеми кои значат отежнување на секојдневниот живот на граѓаните на општина Крушево. Но, за жал, значат и закана по здравјето на граѓаните на општина Крушево. Затоа ни е потребно итно решавање на тие проблеми, но исто така ни е потребно, паралелно со тоа, да имаме и развој, развој на секој сегмент, почнувајќи од инфраструктура до култура, а најважно од се’ во Крушево ни е потребен развој на економијата“, – изјави Нико Чонески, новоизбран градоначалник на Крушево.
Како и во Крушево, на вчерашните избори, ВМРО-ДПМНЕ победи и во соседните општини Македонски Брод и Могила, а додека во Долнени победата ја однесе, кандидатот на коалициониот партнер на ВМРО-ДПМНЕ, „ВРЕДИ“, Блерим Ислами со што овде заврши ерата на градоначалниците од ДУИ.
