Денешниот изборен ден, кој е втор круг за избор на градоначалник на општина Крушево, тече исто како и што започна, во фер и демократска атмосфера. Според ОИК, сите 23 избирачки места, утрово отворени се навреме, точно во 7 часот, а право на глас имаат 7.768 гласачи. Процентот на излезност до 13 часот се движи околу 35 проценти, и спореден со излезноста во претпладневните часови од првиот круг, сега е нешто поголем.
Крушевчани пак, стандардни во своите очекувања. Се надеваат дека новата ЛС ќе обезбеди поголем економски развој на општината, со отворање на нови фабрики и работни места, а со што би се намалило и големото иселување на младите, ама бараат и решавање на тековните комунални и инфраструктурни проблеми со кои секојдневно се судираат.
Истовремено, и во општина Долнени, вториот изборен круг тече без проблеми. До 13 часот на гласање излегле околу 15 проценти од гласачкото тело кое брои 11.929 гласачи кои гласаат на 40 изборни места. Во Могила пак, до истиот временски период излезени се на гласање 18,5 отсто од гласачите чиј број изнесува 4.671 гласач и споредено со првиот круг, процентот на излезност во оваса општина е речиси идентинчен, со тенденција значително да се зголемува во попладневните часови.
