Исклучително богатата, но се’ уште недоволно истражена ризница на македонското материјално и нематеријално културно-историско наследство, врз кои и во 21 век се’ уште се кршат копјата околу тоа кое е и чие е одредено наследство, беше темата на дводневниот Меѓународен научен собир на Институтот за старословенска култура, под наслов: „Материјализација на мислата – Идеолошки концепти во културното наследство“, кој се одржа во Прилеп.
„Јас сметам дека единствениот начин да се дојде до вистината и до одговорите за сите овие прашања кои што се отворени, се токму овие научни истражувања и дека преку науката единствено може да се стигне до продлабочени и вистински сознанија. Токму на овој Научен собир предвидено е да има еден таков дијалог со партиципанти од различни земји, од земјата, од околните држави, од САД“, – изјави д-р Александар Василески, директор на ЈНУ Институт за старословенска култура – Прилеп.
„Во рамките на моето предавање јас ќе ги презентирам резултатите од истражувањата кои што беа спроведувани на Археолошкиот локалитет „Црнобуки“ во Демир Капија кои ги реализиравме во соработка со Заводот и Музеј од Битола и Институтот за старословенска култура од Прилеп“, – рече Џесика Рудел, струдент-истражувач од Колумбија, САД.
Примарната цел за одржување на овој Научен собир беше да се промовираат суштинските вредности на материјалното и нематеријалното културно наследство, кои пред се’ се втемелени во културната историја и традиција. Овој Научен собир ќе даде значаен придонес кон интернационалната афирмација на македонското културно наследство, како значаен ресурс на колективната меморија и културната размена, објаснува д-р Василески. Со презентациите и дискусиите се придонесува во разбирањето и значењето кое го имале и го имаат идеолошките парадигми и религсиските сфаќања на општествено и индивидуално ниво, како и за нивното влијание врз архитектурата, уметноста, обичаите, јазикот, фолклорните и литературните творби. Во оваа насока, Институт досега има издадено и бројни научни публикации кои се од особена важност за понатамошните истражувања на националното културно наследство.
