Поранешниот градоначалник на Општина Илинден, Жика Стојановски, повторно ќе ја бара довербата на жителите, овојпат како кандидат за градоначалник од СДСМ.
Претходно, тој беше градоначалник од ВМРО-ДПМНЕ во четири мандати, а на минатите избори се обиде како независен кандидат, откако партијата одлучи да го предложи актуелниот градоначалник Александар Георгиевски.
СДСМ, освен Стојановски, објави уште тројца кандидати по вчерашната седница на Извршниот одбор.
Едис Хасан е кандидат за градоначалник на Шуто Оризари, Игор Христов за Кочани, а Исуф Синани е кандидат за Долнени.
Досега социјалдемократите објавија вкупно 64 кандидати за градоначалници. ВМРО-ДПМНЕ веќе ги објави сите кандидати за градоначалници на претстојните избори, кои ќе се одржат на 19 октомври.
