Почнаа гужвите по книжарниците пред стартот на учебната година. „Помалку трошоци – повеќе за тебе “ стапи на сила – мерката што им овозможува на родителите да пазарат со 15 % попуст за да му овозможат на детето да ја следи училишната настава. Трговците се уште ги лепат цените и се подготвуваат, а попустот важи на каса за секој купен производ. Од Mинистерството за економија им даваат на трговците рок до крајот на оваа недела да ги усогласат цените, а од вторник најавуваат инспекциски надзори.
„Таму каде што ќе обележуваме дека не се почитува мерката или се злоупотребува, нормално дека во рамки на законот заедно со Државниот пазарен инспекторат ќе постапуваме.“– вели Бесар Дурмиши, Министерот за економија.
Со владината одлука за пониски цени на училишниот прибор, сметката од 3000 денари се намалува на околу 2500, а за семејствата со две деца заштедата може да достигне и 1.000 денари.
Пример што се му е потребно на еден четвртооделенец во Македонија? Според листата која ја добиваат од училиштето – шест големи тетратки, една нотарка, блок, подлога, чашка, темперни и четки. Линијар и агломер по математика, а приборот треба да биде богат со дрвени боици, фломастери, моливи, гума, острилка и две пенкала. Па така согласно оваа листа се упативме во книшарница да видиме колку чини сето ова. Тетратка што претходно чинела 90 денари, ја плативме 76 денари. Темперни со редовна цена од 240 денари, ги купивме за 200 денари. Сметката која требаше да чини 2300 денари се намали на околу 1900 денари.
Граѓаните ја поздравуваат владината мерка. Велат дека навистина им помага да заштедат, но сепак би сакале попустот да биде и поголем.
„Помага, со тоа заштедуваме, се е на 15% попуст. Макар и 15% ни помага. Би сакале и бесплатен да е приборот.“– велат граѓаните.
Инаку веќе трета година Владата ја спроведува оваа мерка. Трговците се должни покрај новата, намалена цена на производот, да ја прикажат и старата цена која важела на 1 јуни 2026 година бидејќи токму оваа цена се зема како базична, врз основа на која се утврдува намалувањето. Новите, пониски цени ќе важат до 30 септември.
