Македонија континуирано го губи младото население, а последиците од демографскиот пад веќе се чувствуваат и во образованието. За само десетина години бројот на средношколци од над 20.000 е намален на околу 14.000. Сè помалиот број на првачиња ќе се одрази и врз средното и врз високото образование.
На најстариот универзитет во Македонија, „Свети Кирил и Методиј“, во последните години годишно се запишуваат околу пет до шест илјади студенти. Во првиот уписен рок годинава се запишале околу 4.700, а се очекува бројката да надмине 5.000, меѓу другото и поради странските студенти. Но, според ректорката на УКИМ, Ангелова, без системски мерки тешко ќе се запре континуираното намалување на идните студенти и академски граѓани.
„Сметам дека е алармантна појава и дека мора да се преземат системски мерки да се задржат пред сè младите луѓе во земјава, да се креираат мерки со кои што ќе им се обезбеди сигурност, вработење со цел да имаме што повеќе млади луѓе и сите да останат во земјава, за да може перманентно оваа појава во континуитет во иднина да почне да се менуваат состојбите и да се зголемува бројот на млади луѓе“, 03.42 – вели Билјана Ангелова, ректор на УКИМ.
И додека државата бара начин како да ги задржи младите во земјава, во Струга учениците се соочуваат со проблем кој директно ги засега. Од 1 септември ќе останат без организиран превоз до училиштата. Превозниците втор ден бојкотираат, бараат исплата на заостанатите долгови, но и повисока цена на билетите. Долгот од 60.000 евра, направен во време на Рамиз Мерко, ќе се исплати до крајот на годинава, уверува актуелниот струшки градоначалник.
„Нормално, се чека на Советот да помине и тоа покачување на цената. Но, можам да ги уверам сите возачи и транспортери дека сите долгови, и оние што се од пред две-три години што останале од другата власт, ќе се исплатат. Но, нормално, треба малку да се почека, да добиеме на време, затоа што не се само тие долгови, има и други долгови“, 15.02 – вели Менди Ќура, градоначалник на Струга.
Свесни дека најмногу ќе трпат учениците, превозниците сепак не отстапуваат, бараат целосна исплата на долгот и повисока цена на билетите.
