Во пресрет на почетокот на жетвата на оризот во регионот на Кочани, министерот за земјоделство, шумарство и водостопанство Борче Серафимовски денеска престојуваше во Општина Чешиново-Облешево, при што заедно со градоначалникот Јорданчо Костадинов оствари средба со претставници на дел од фабриките за преработка на ориз и со земјоделците од Општината.
На средбата, според информации од Општината, се разговарало за состојбата со залихите на ориз и оризова арпа, трошоците и производната цена, очекувањата од претстојната реколта, како и за откупната цена на оризовата арпа.
Серафимовски, на оваа средба истакнал дека оризопроизводството има стратешко значење за Кочанскиот регион и претставува важен дел од локалната економија и егзистенцијата на голем број семејства.
-Наш приоритет е да создадеме услови за одржливо и профитабилно производство, сигурен пласман и фер вреднување на трудот на оризопроизводителите – порачал министерот Серафимовски.
Дијалогот со земјоделците и преработувачите на ориз ќе продолжи, со цел решенијата да се носат заеднички и врз основа на реалните состојби на терен, најавил министерот Серафимовски.
