Не сме ниту законодавец ниту Уставен суд туку постапуваме согласно законот. Вака претседателот на ДИК Борис Кондарко ги коментираше бурните реакции дека локалните избори може да се претворат во циркус, по одлуката само со два потписи секој полнолетник да може да се кандидира за советник или градоначалник За да не се сочуваме со несериозни кандидати на локалните кои сакаат само да ги има на телевизија, а немаат вистинска намера да се дел од локалната власт, Кондарко рече дека Собранието треба да го реши овој проблем. Исто така тој имаше замерки дека во јавноста никој не понудил никакво друго решение, туку сите прстот го впериле во правилникот, кој според претседателот на ДИК е донесен согласно законските можности. Членовите на ДИК остануваат зад својата одлука.
Новите правила на игра доаѓаат откако Уставниот суд во мај годинава укина две одредби од Изборниот законик, кои го одредуваа бројот на потписи што треба да се соберат за независни листи. Тогаш прагот беше 1% од запишаните избирачи во дадената изборна единица и наиде на критики од граѓанските инцијативи. По неговото укинување остана нерегулирано прашањето колку потписи тие треба да соберат за да поднесат листи на кандидати за членови на Совет, односно за градоначалник.
Викендов пратениците се обидоа да го регулираат ова преку измени во Изборниот законик – но ДУИ ги минираше обидите бидејќи гласаше против, со што не беше исполнет условот за Бадентер. Предлогот на владејачкото мнозинство беше прагот да биде 0,95% од бројот на избирачи во дадената општина, а преку амандмани на Левица тој праг се намали на 0,5% – сепак измените не поминаа.
