Минатата година, македонските граѓани оставиле повеќе од 209 милиони евра во спортските обложувалници, покажуваат податоците на Управата за јавни приходи, објавени од Блумберг Адриа. Просечната уплата по тикет изнесувала 269 денари.
Обложувалниците исплатиле добивки во вкупна вредност од 169 милиони евра – околу 40 милиони евра помалку од вкупно вложената сума. Најголемата исплатена добивка на еден тикет достигнала речиси 68 илјади евра.
Од исплатата на добивки, државата наплатила над 20 милиони евра само по основ на данок на личен доход.
Анализите покажуваат дека вложувањата во спортско обложување се зголемуваат од година во година. Во 2022 година, износот бил околу 193 милиони евра, а во 2021 нешто над 185 милиони евра. Трендот укажува на растечка популарност на оваа индустрија и на зголемен профит и за обложувалниците и за државата преку даноците.
Во моментов, во Македонија работат околу 800 лиценцирани обложувалници и приредувачи на игри на среќа.
