Македонија силно го поддржува американскиот претседател Доналд Трамп и политиката на неговата администрација и сака стратешкиот дијалог со Вашингтон да се претвори во конкретни резултати во безбедноста, енергетиката, инфраструктурата, трговијата и инвестициите – посочи премиерот Христијан Мицкоски во интервју дадено за „Брајтбарт њуз4.
Мицкоски нагласува дека поддршката за Трамп од страна на македонската Влада почнала уште пред тој повторно да биде избран за претседател на САД. Посочува дека Македонија била меѓу првите европски земји што воспоставиле контакт со луѓе од тимот на Трамп уште во текот на неговата изборна кампања во 2024 година.
-Дури и пред да стане претседател на Соединетите Американски Држави, некои од луѓето, кои се дел од неговиот најблизок периметар, нè посетија и за време на кампањата кога немаше премногу европски нации што веруваа дека Трамп ќе стане претседател, напиша Мицкоски.
Тој нагласува дека поддршката на Трамп во Македонија е многу висока, повисока од каде било во Европа, и дека со задоволство би го пречекал Трамп во земјата доколку распоредот на американскиот претседател го дозволува тоа. Мицкоски, исто така, нагласува дека Македонија била меѓу првите земји што започнале разговори со администрацијата на Трамп по воведувањето на американските царини и дека во преговорите била постигната билатерална спогодба за нулта царинска стапка.
-Имаме нула царини кога станува збор за извоз на македонски производи во Соединетите Американски Држави. Значи, практично, повеќе или помалку, имаме заедничка основа и мислам дека наскоро, веројатно има можност сега за време на Генералното собрание на ОН да имаме официјален состанок, или во Белата куќа или каде било, за да го потпишеме овој билатерален договор меѓу двете земји. Затоа мислам дека ова ќе додаде вредност на односите меѓу двете земји, напиша Мицкоски.
Во интервјуто, Мицкоски говори и за евроинтеграциите. Тој нагласува дека Македонија сака да стане членка на ЕУ, но дека во самата ЕУ владејат двојни стандарди, а деценискиот процес на земјава за зачленување е проткаен со низа на отстапки кои Македонија ги направи (спроведе). Според бирократите од Брисел и од целиот свет, вели Мицкоски во интервјуто за „Брајтбарт њуз, тоа требало да биде последното нешто што го направивме, но, за жал, како што вели премиерот, тие нè предадоа и нè излажаа.
