Започна реконструкцијата на просторот од поранешниот Општествен дом „Рид“, каде за пет месеци во Прилеп треба да профункционира првиот Дневен центар за стари лица за активно стареење. Стручните услуги на новиот Центар, со површина од 100 метри квадратни, ќе можат да ги користат 48 лица над 65 години, распоредени во две групи по четири часа дневно за група. Инвестицијата е вредна вкупно 7 милиони денари, од кои 2 милиони денари се за уредувањето на просторот, и 5 милиони денари за платите на четирите нововработени стручни лица, како и за тековните режиски трошоци, планирани согласно Програмата за активно стареење на корисниците.
„Овој грант е дел од посеопфатната политика на Министерството за труд и социјална политика, демографија и млади со поддршка на Светска банка за навистина да се овозможи пристап на услуги, согласно потребите на граѓаните, децентрализација на социјалните услуги и плурализација во овој дел“, – кажа Марина Тошеска од Центарот за едукација и развој од Прилеп.
Во овој Центар, корисниците ќе добиваат услуги на социјализација, здравствена поддршка, а воедно и услуги за едукативни и културни активности кои ќе бидат давани од вработениот професионален кадар.
„Овој Проект претставува значаен чекор во остварување и градење на едно хумано, инклузивно и грижливо општество… Пред повеќе од една недела го потпишавме Договорот, односно грантот со Министерството, при што се обезбедија тие средства за остварување на овие социјални услуги. Тоа беше првиот чекор за реализација на овој Проект“, – изјави Борче Јовчески, градоначалник на Прилеп.
Реконструкцијата на објектот треба да заврши кон крајот на септември, по што, согласно Правилникот за воведување и воспоставување на социјални услуги, ќе следат законските административни активности. Потенцијалните корисници најпрвин треба да се пријавуваат во МЦСР во Прилеп. Инаку, во државава вакви центри веќе постојат во четири општини, а наскоро треба да се отвори и во Битола.
