Министерот за надворешни работи Тимчо Муцунски и британскиот шеф на дипломатијата Дејвид Лами денеска во Лондон ја потпишаа Декларацијата за стратешко партнерство, со која се зајакнуваат билатералните односи и се отвора ново поглавје во соработката меѓу Македонија и Обединетото Кралство.
Муцунски изјави дека документот ќе ја продлабочи соработката во надворешната политика, безбедноста и одбраната, особено во рамки на НАТО, а договорот „влада со влада“ ќе поттикне економски раст, трговија и реализација на инфраструктурни проекти.
Потенцијалот од новото партнерство се проценува на над 6 милијарди евра инвестиции. Започнуваат крупни проекти, меѓу кои и брзата железница на Коридорот 10, како и вложувања во здравството и образованието.
Во рамки на посетата во Лондон, Муцунски и министерот за одбрана Владо Мисајловски одржаа и други високи средби насочени кон унапредување на економската соработка и инвестициите.
