РЕК Битола, најдоцна за една година, има шанса да престане да увезува скап јаглен. Петнаесетина години испитуваната жица за нов ископ на јаглен во близина на селото Живојно и на двата веќе постоечки рудници, може да стане единственото решение за комплетно покривање на потребите од овој енергенс на Комбинатот од сопствено производство, а кој сега учествува дури со 50 отсто во производната цена на струјата. Со тоа, според експертите, би се намалила и енергетската зависност на земјава, но и цената на струјата. Плус, станувало збор и за исклучително квалитетен јаглен.
„Според проценките од геолошките истражувања и достапната документација, предвидувањата се дека на наоѓалиштето имаме околу 24 милиони тони јаглен, а реализацијата и динамичкиот план треба да се одвива во период од 7 години. Со таа динамика, тој период од 7 години, ќе се совпадне со моментот на напуштањето на производството на електрична енергија од т.н нееколошки извори и ресурси“ – вели Тони Ангелевски, помошник директор за развој и инвестиции на РЕК Битола.
Во период на енергетска трансформација кон целосно „зелени“ енергенси, а која треба да заврши до 2030 година и за што АД ЕСМ веќе работи на елиминирањето на набавката на увезен јаглен за потребите на РЕК Битола, работи и на кампањата за обезбедување на домашен јаглен од овој нов коп. За придобивките и негативностите од овој проект, најмногу врз животната средина, веќе е изготвена и Студија.
„Студијата е изработена на исклучително високо ниво, сеопфатна е. Од Управата за заштита на животната средина ги има добиено насоките, изработена е согласно важечките прописи во нашата држава, ги има сите елементи, сите области и сите аспекти од влијанието врз животната средина“, – открива Тони Ангелевски.
Сепак, во Студијата изработена од „Технолаб“ од Скопје, се укажува и на негативностите. Станувало збор за создавање на сосема нов објект, со површинско ископување, пренесување и одлагање, а тоа можело негативно да влијае врз биодиверзитетот на животинскиот и растителниот свет во тој регион, како и врз слободното движење на месното население. Од АД ЕСМ пак, велат дека отворањето на копот ќе значи економски исплатливо домашно производство, што е и национален интерес. Од овие причини, неодамна во Битола, МЖСПП одржа и јавна расправа, по чија евалуација ќе треба да се финализираат и понатамашните чекори за реализацијата на овој проект.
