Македонскиот јазик добива нова институционална поддршка – од задолжителни обуки за лектори, преку поддршка за медиумите, до стипендии за студентите. Со новите мерки и активноста на новоформираниот Инспекторат за употреба на македонскиот јазик, државата јасно ја покажува својата намера за негова заштита, унапредување и промоција. Со стапувањето во сила на овие мерки, се очекува пораст на интересот за студирање македонски јазик, а кога станува збор за јазичната култура кај пошироката јавност, раководителката на Катедрата за македонски јазик, Пановска-Димкова, истакнува дека е потребно свесно влијание врз јавноста, вклучително и преку медиумите.
„Тоа не мора да бидат специјализирани емисии за граматика, тоа се знае – се земаат, да речеме, популарни личности, тие се обучуваат да зборуваат правилно и на тој начин посредно влијаат врз народот, ја подигаат свеста кај луѓето. Се разбира дека очекуваме поголем број студенти сега, откако законот стапи во сила. Вработувањата се главниот мотив за идните студенти, а и стипендиите би требало да ги поттикнат да се запишат во поголем број. Во моментов, колку студенти има на прва година? Дваесетина“, вели Искра Пановска-Димкова, раководителка на Катедрата за македонски јазик.
Во споредба со други држави, таа ја истакнува Словенија како позитивен пример – земја каде што свеста за јазикот е на повисоко ниво, благодарение на јасна и доследна стратегија за заштита од англицизми. Од Институтот за македонски јазик „Крсте Мисирков“ најавуваат значајни проекти. Директорката Елена Јованова-Грујовска посочува дека македонскиот јазик сè уште нема свој етимолошки речник, ниту лингвистички корпус – нешто што одамна претставува стандард кај останатите словенски јазици.
„Ние сме подготвени да влеземе во проект наречен корпус на македонскиот јазик. Институтот располага со доволно едуциран, квалитетен научен кадар, а од друга страна – со електронско богатство, збир од девет картотеки што ги опфаќаат сите рамништа на јазикот“, рече Елена Јованова-Грујовска.
Во наредниот период, таа подвлече дека е неопходна државна поддршка, особено преку Министерствата за образование и наука и култура, за заеднички да се обезбеди долгорочна заштита и развој на македонскиот јазик, не само како службен, туку и како културна вредност што заслужува постојана грижа и унапредување.
