Општина Македонска Каменица објави jавен повик за субвенционирање на изработка на проектна документација, поставување енергетско-ефикасни фасади и реконструкција на кровови на станбени згради за колективно домување.
Повикот се реализира во рамки на проектот „Енергетско Ефикасни Домови“, чија цел е подобрување на енергетската ефикасност и условите за домување во станбените објекти.
Согласно повикот, Општина Македонска Каменица ќе обезбеди финансиска поддршка во висина од 40 отсто од вкупната вредност на инвестицијата, но не повеќе од милион денари за секоја одобрена апликација. Останатите средства, во висина од најмалку 60 отсто, ги обезбедуваат сопствениците на посебните делови во станбената зграда.
Право на учество имаат заедниците на сопственици и сопствениците на посебни делови во станбени згради управувани од управител, на подрачјето на Општина Македонска Каменица.
Еден од основните услови е зградата да биде постара од 25 години, а најмалку 70 отсто од станарите да имаат потпишано изјава за учество во проектот. Потребно е да биде донесена и одлука за реконструкција и воведување мерки за енергетска ефикасност, како и да биде обезбедено сопственото учество од најмалку 60 отсто од инвестицијата.
Од повикот се исклучени станбените згради за колективно домување кои имаат помалку од два ката со приземје.
Рокот за поднесување на апликациите е до крајот на месец август, а апликациите со потребната документација се доставуваат во Архивата на Општина Македонска Каменица, секој работен ден од 07:30 до 15:30 часот, или по пошта на адреса: улица „Каменичка“ број 2, Македонска Каменица.
Од Општината ги повикуваат сите заедници на сопственици кои ги исполнуваат условите да ја искористат можноста за финансиска поддршка и да придонесат кон подобрување на енергетската ефикасност, изгледот и условите за домување во станбените објекти.
