На 46-тата собраниска седница, каде се расправаше за интерпелацијата на министерот за внатрешни работи Панче Тошковски, координаторот на пратеничката група на ВМРО-ДПМНЕ, Никола Мицевски, истакна дека нема да дозволат политичките профитери од опозицијата да ја злоупотребат трагедијата во Кочани за политички цели. Тој нагласи дека единствениот начин за решавање на случајот е преку институционален и брз пристап.
„Нема да ги дозволиме политичките профитери од опозицијата да ја злоупотребат, вулгализираат и да ја пренесат на улица трагедијата во Кочани и да си поигруваат со тажната судбина на овие луѓе“, рече Мицевски.
Тој информираше дека министерот Тошковски ќе се сретне со семејствата на загинатите денеска во 14:30 часот во Министерството за внатрешни работи. Поради тоа, Мицевски побара еден час пауза од собраниската седница.
„Од овие причини, барам еден час пауза. А потоа ќе продолжиме со работа по интерпелацијата, за која што очигледно не ви е гајле, бидејќи тој што ја поднесе, прв замина и не е присутен на оваа пленарна седница“, додаде тој.
