Амбулантно возило, комплетно опремено за транспорт, но и за сите основни здравствени прегледи кои ќе се спроведуваат во прилепската ромска населба „Тризла“ кај најзагрозените ромски семејства кои немаат пристап до здравството, од денеска и’ е ставено на располагање на оваа заедница. Возилото, кое е дел од Проектот од ЕУ „Обезбедување пристојни услови за живот за ромските домаќинства во општина Прилеп“, а спроведен од ЦЕЛИМ од Милано, РРЦ – Скопје, општина Прилеп и од Рома Перспектив Прилеп, ќе биде во владение на прилепската Општа болница со проширена надлежност.
„Ќе го користиме за потребите на болницата, но исто така ќе го користиме и за извршување на прегледи во населбата „Тризла“ во договор со НВО ќе направиме некои скриниг испитувања на социјално загрозените пациенти. Проектот започна уште минатата година, недостигот на амбулантни возила го имаме, а голем дел се стари возила, и секако возилото е добредојдено“, – изјави д-р Кире Јоноски, директор на ЈЗУ Општа болница – Прилеп.
„Со дореализацијата во мај оваа година 2025, максимално е исполнет овој проект. ЛС секогаш останува доследна за реализирање на сите барања и очекувања на нашите сограѓани, се’ со една цел – да имаат подобар економски и здравствен живот во нашата општина“, – посочи Борче Јовчески, градоначалник на Прилеп.
Една од основните активности на овој Проект е спроведување итни мерки за подобрување на здравствената заштита и услугите за домашна нега на ромското население што живее во населбата „Тризла“, а како одговор на претходниот повик за предлози до ЕУ во Македонија – „ЕУ за Ромите и луѓето кои живеат во длабока сиромаштија“.
„Она што е специфично е што ова возило не е само транспортно возило и не е Брза помош, туку ова возило е Мобилна клиника, со што, ние во договор со општината и болницата, договоривме еден план со кој ќе се овозможуваат основни здравствени прегледи на ромската зедница, најмалку двапати месечно, каде што тим од болницата кој ќе го формира, ќе оди редовно да спроведува основни здравствени прегледи во ромската заедница“, – рече Себихан Демировски, ген. менаџер на Ромскиот ресурсен центар од Скопје.
Овој проект се имплементира веќе три години и е во согласност со Акциската програма ИПА 2 2019 – ЕУ за инклузија, и треба да придонесе за реализација на приоритетите идентификувани уште во стратегија „Роми во Република Македонија 2014-2020“, а кои опфаќаат подобрување на условите за домување и услугите на заедницата за најранливите Роми кои живеат во Македонија.
