Речиси 30 фирми кои работат со храна биле затекнати со прекршувања на законските прописи при 617 вонредни инспекции што ги спроведе Агенцијата за храна и ветеринарство низ целата земја. Небезбедна храна, нехигиенски услови и нерегистрирани објекти се само дел од сликата што ја откри надзорот пред велигденските празници. Кај 16 оператори биле утврдени нехигиенски и структурни недостатоци, а осум продавале храна со погрешни декларации.
„Инспекторите изрекоа 30 парични казни во износ од 25.400 евра и издале 44 решенија за отстранување на недоследностите. Уништени се 1.740 килограми небезбедна храна“, информираат од Агенцијата за Храна и Ветеринарство.
Во најголем дел, констатираните прекршувања се однесуваат на основни правила кои треба да обезбедат безбедна храна и сигурни услови за нејзино складирање и продажба. Без санитарни книшки, без прегледи, храна сервирале лица надвор од секој здравствен протокол, во четири објекти во Македонија.
Контролите резултираа со издавање на конкретни решенија за отстранување на утврдените недостатоци и сериозни казни, главно поради пуштање во промет на небезбедна храна и работа надвор од регулативата. Одредени количини храна биле веднаш повлечени и уништени.
„Пет субјекти воопшто не биле регистрирани, а во четири објекти персоналот немал валидни санитарни книшки“ информираат од Агенцијата за храна и ветеринарство.
Од АХВ апелираат до сите оператори со храна да постапуваат одговорно и по пропис, не само за да избегнат санкции, туку и за да се заштити јавното здрајве и довербата на пазарот. Надзорот ќе продолжи и по празниците.
