Кочанските и штипските болници останале празни, бидејќи сите 84 пациенти биле пренесени на клиниките во Скопје, информираше министерот за здравство, Арбен Таравари. Според него, состојбата на пациентите се менува, а до крајот на денот се очекува уште 26 пациенти да бидат упатени на лекување во странство.
Четири пациенти ќе заминат во Словенија и Хрватска, шест во Австрија и 12 во Белград. Министерот Таравари потврди дека состојбата на сите пациенти е стабилна, и се надеваат дека нема да дојде до компликации или влошување на здравствената состојба.
Здравствените власти апелираат до сите оние кои биле во близина на пожарот, да се јават на преглед на скопските клиники, бидејќи 18 пациенти од Кочани денеска пријавиле изгореници и симптоми на гушење.
Директорот на Фондот за здравствено осигурување, Сашо Клековски, изрази загриженост за тоа што од 2016 година во Македонија нема Центар за изгореници. Тој истакна дека дури и ако поранешниот центар бил функционален или да се отвори нов, капацитетот на таков центар немало да биде доволен за да се справи со големиот број пациенти.
„Центарот за изгореници би можел да биде функционален за четири до пет пациенти, но не и за 40-50 или 100 пациенти. Тоа е реалност која мора да се комуницира“, рече Клековски.
Тимовите на Црвениот крст постојано се присутни на терен. Тие информираа дека моментално немаат потреба од други донации, освен од финансиска помош, преку отворените линии.
„На оваа точка работат девет волонтери, а има и други пунктови во близина на семејствата на настраданите“, изјави Арген Чирафи од Црвен крст.
Две деца кои се на лекување во Турција започнале самостојно да дишат, а три деца кои се во Грција, биле оперирани ноќеска поради внатрешни и надворешни изгореници. Во трагичниот пожар загинаа 59 млади лица, а до сега на 15 од нив им е извршена обдукција.
