Увозници, шпедитери, возачи кои биле вработени во превозни компании и царински службеници, без да платат царина, носеле половни возила од странство во Македонија и ги оставале на автоплацеви за да ги препродадат.
За неколку месеци од крајот на 2023-та и во текот на првата половина од 2024-та пренесени биле 35 возила во вкупна вредност од 20 милиони денари (325 илјади евра), со што Буџетот поради неплатени давачки е оштетен за околу
150 илјади евра. Во моментов поднесени се кривични пријави против 24 физички и правни лица до обвинителство за организиран криминал и корупција, а од Царина најавуваат дека ќе има уште, затоа што веројатно криминалот се случувал во минатото повеќе пати. За овие 35 возила биле замешани две шпедиции , двајца увозници и еден царински склад.
Досега до Основно јавно обвинителство за гонење организиран криминал и корупција се поднесени кривични пријави за 24 лица, 19 физички и пет правни лица, за сторени кривични дела: царинска измама, прикривање стока од сторено кривично дело царинска измама, фалсификување и злоупотреба на службената должност и овластувањето. Со целосно завршување на предистражните и истражните дејства кривични пријави ќе следуваат за други лица, при што некои од нив ќе се товарат за повеќекратно извршување исти или слични дела. Во однос на царинските службеници што извршиле злоупотреба на службената положба и овластувањето, во тек се дисциплински постапки по што ќе следуваат соодветни казнени мерки“, изјави Николовски.
Автоплацевите не успеале да ги препродадат колите, според информациите од Царина сите 35 се пронајдени на различни плацеви и во моментов се под царински надзор. За 8-те цариници за кои биле замешани во шверцувањето на возилата е отворена дисциплинска постапка.
Николовски најави во иднина расветлување на целиот криминал кој што се случувал во Царина како и зголемена наплата на давачките. Само за пример во изминатите шест месеци наплатата на данокот за моторни возила е драстично повисока од претходно, во јули 2024-та за истиот период 2023, била повисока за дури 46 проценти.
